டிசம்பர் 2 முதல் புதுடில்லி-சான்பிரான்சிஸ்கோ நேரடி விமானம். சென்னை பயணிகளுக்கு புதிய வசதி

சென்னையில் இருந்து அமெரிக்காவின் முக்கிய நகரமான சான்பிராசிஸ்கோ நகருக்கு நேரடியாக செல்ல ஏர் இந்தியா நிறுவனம் வழிவகை செய்துள்ளது. இதன்படி வரும் டிசம்பர் மாதம் 2ஆம் தேதி முதல் புதுடில்லியில் இருந்து சான்ஃபிரான்சிஸ்கோ நகருக்கு முதல்முறையாக நேரடி விமானம் ஒன்று இயக்கப்படவுள்ளது. இந்த விமானத்தில் செல்ல விரும்பும் சென்னை பயணிகளுக்காக விமானம் கிளம்பும்  புதன், வெள்ளி, ஞாயிற்றுக்கிழமைகளில் சென்னையில் இருந்து புதுடில்லி செல்ல ஏஐ043 என்ற விமானம் ஏற்பாடு செய்யப்பட்டுள்ளது.

புதுடில்லி-சான்பிராசிஸ்கோ விமானம் அதிகாலை 2.45க்கு கிளம்பவுள்ள நிலையில் சென்னையில் இருந்து கிளம்பும் ஏஐ043 விமானம் இரவு 8.30 மணிக்கு புறப்பட்டு இரவு 11 மணிக்கு புதுதில்லி விமான நிலையத்தைச் சென்றடையும். அதன்பின்னர் சென்னை பயணிகள் புதுடில்லி-சான்பிராசிஸ்கோ விமானத்தில் மாறிக்கொள்ளலாம்.

இந்த விமானம் புதுடில்லியில் இருந்து சான்பிராசிஸ்கோ நகரை 16 மணி நேரம் 45 நிமிடங்களில் சென்றடையும். இந்த விமானத்தில் சொகுசு வசதிகளுடன் கூடிய முதல் வகுப்பில் 8 இருக்கைகள், பிசினஸ் கிளாஸ் வகுப்பில் 35 இருக்கைகள், சாதாரண வகுப்பில் 195 இருக்கைகள் என மொத்தம் 238 இருக்கைகள் உள்ளன.

சாதாரண வகுப்பில் பயணம் செய்வதற்கான கட்டணம் வரி நீங்கலாக ரூ.65,000 என நிர்ணயிக்கப்பட்டுள்ளது. புதிய சேவை தொடங்கப்பட்டதை முன்னிட்டு இந்த விமானத்தில் முதல் வகுப்பு, பிசினஸ் வகுப்பில் பயணம் செய்வோருக்கு இந்தியாவுக்குள் பயணம் செய்வதற்கான ஒரு டிக்கெட் இலவசமாக வழங்கப்படும் என ஏர் இந்தியா நிறுவனம் அறிவித்துள்ளது.

English Summary: San Francisco marks beginning of first-ever non-stop flight from New Delhi to the city by Air India from December 2