செல்பி எடுக்கும் இயந்திரம்தான் மோடி. ராகுல்காந்தி   தாக்கு

உத்தரபிரதேச மாநிலத்தின் தேர்தல் விரைவில் நடக்கவுள்ளதை அடுத்து தேசிய கட்சிகளும், மாநில கட்சிகளும் தேர்தல் பணிகளை முடுக்கிவிட்டுள்ளது. இந்நிலையில் கடந்த சில நாட்களாக உ.பியில் சுற்றுப்பயணம் செய்து வரும் காங்கிரஸ் கட்சியின் துணைத் தலைவர் ராகுல் காந்தி, பிரதமர் மோடியை நேற்றைய பிரச்சாரத்தில் கடுமையாக தாக்கி பேசியுள்ளார். பிரதமர் மோடி செல்ஃபி எடுத்துக் கொள்ளும், வாக்குறுதி அளிக்கும் இயந்திரம் தான் என்று அவர் கூறியுள்ளதால் பாஜகவினர் இடையே பரபரப்பு ஏற்பட்டுள்ளது.

மேலும் ராகுல்காந்தி நேற்றைய பிரச்சாரத்தில் கூறியபோது, ‘ ”நமது நாட்டில் இந்து, முஸ்லிம், கிறிஸ்தவர், சீக்கியர் என அனைத்து தரப்பினரும் ஒற்றுமையுடனும், அமைதியுடனும் வாழ்ந்து வருகின்றனர். ஆனால், மக்களிடையே வெறுப்புணர்வை ஏற்படுத்தும் வேலையை பிரதமர் மோடி செய்து வருகிறார்.

தேர்தலின்போது மோடி, நல்ல நாட்கள் வரும் என்று வாக்குறுதி அளித்தார். இதேபோல், கருப்புப் பணத்தை மீட்டு ஒவ்வொரு குடிமகனின் வங்கிக் கணக்கிலும் ரூ.15 லட்சம் செலுத்தப்படும், விவசாயிகளின் விளைபொருட்களுக்கு நியாயமான விலை அளிக்கப்படும், 2 கோடிக்கும் மேற்பட்ட புதிய வேலைவாய்ப்பு உருவாக்கப்படும் என்று பல வாக்குறுதிகளையும் மக்களிடம் அள்ளி வீசினார் மோடி.

ஆனால் அவர் தேர்தலில் வெற்றி பெற்ற பின், தொழிலதிபர்களாக உள்ள அவரது ஒருசில நண்பர்களுக்கு மட்டும்தான் நல்ல காலம் பிறந்துள்ளது. தற்போது அவர், செல்பி எடுக்கும் இயந்திரமாகவும், வாக்குறுதிகளை அள்ளி வீசும் இயந்திரமாகவும் தான் வலம் வருகிறார்.

இந்த நாடு அனைத்து மதத்தினருக்கும், அனைத்து ஜாதியினருக்கும், ஏழை, எளிய மக்களுக்கும் பொதுவானது. இதனை நிலை நிறுத்த காங்கிரஸ் கட்சியும், அதன் தலைவர்களும் தொடர்ந்து பாடுபடுவோம் காங்கிரஸ் கூட்டணி தொடர்ந்து 10 ஆண்டுகள் ஆட்சியில் இருந்தபோது, எங்கும் வன்முறை நிகழ்ந்தது இல்லை. ஆனால் மோடி ஆட்சியில் மத மோதல்கள் அதிகரித்துள்ளன. இவ்வாறு ராகுல்காந்தி பேசினார்.,