shadow

காவிரி வழக்கில் தமிழக அரசின் கோரிக்கை நிராகரிப்பு: சுப்ரீம் கோர்ட் அதிரடியால் தமிழர்கள் அதிர்ச்சி

தமிழகத்திற்கு ஆண்டு தோறும், 192 டி.எம்.சி., காவிரி நீரை, கர்நாடகா வழங்க வேண்டும். இந்தாண்டு ஜூன் முதல், நேற்று வரை, 164 டி.எம்.சி., நீரை கர்நாடக அரசு வழங்கி இருக்க வேண்டும். ஆனால், 100 டி.எம்.சி., மட்டுமே வழங்கியுள்ளது. 64 டி.எம்.சி., பாக்கி வைக்கப்பட்டு உள்ளது.

காவிரி நதி நீர்ப்பங்கீடு தொடர்பாக காவிரி நடுவர் மன்றம் அளித்த இறுதித் தீர்ப்பை எதிர்த்து தமிழகம், கர்நாடகம், கேரளம் ஆகிய மாநிலங்கள் உச்ச நீதிமன்றத்தில் மேல்முறையீடு செய்தன. இந்த வழக்கின் இறுதிக்கட்ட வாதம் கடந்த ஜூலை மாதம் தொடங்கியது. சுமார் இரண்டு மாத காலம் நீடித்த இறுதிக்கட்ட வாதம், கடந்த செப்டம்பர் மாதம் நிறைவடைந்த நிலையில், தேதி குறிப்பிடாமல் தீர்ப்பு ஒத்திவைக்கப்பட்டுள்ளது.

இந்நிலையில், தமிழகத்திற்கு நடப்பாண்டில் காவிரியில் இருந்து 63 டி.எம்.சி. தண்ணீர் திறக்க வேண்டும். எனவே, 63 டி.எம்.சி. காவிரி நீரை திறந்து விட உத்தரவிடக் கோரி தமிழக அரசு மனு தாக்கல் செய்ய முன்வந்தது. இதற்காக உச்ச நீதிமன்றத்தில் அனுமதி கேட்டது. ஆனால், தமிழக அரசின் கோரிக்கையை உச்ச நீதிமன்றம் நிராகரித்துவிட்டது.

காவிரி விவகாரத்தில் நடுவர் மன்ற தீர்ப்புக்கு எதிரான வழக்கில் தீர்ப்பு ஒத்திவைக்கப்பட்டுள்ளதால் புதிய மனு தாக்கல் செய்வதை அனுமதிக்க முடியாது என நீதிமன்றம் தெரிவித்துள்ளது.

டெல்டா மாவட்டங்களின் சம்பா சாகுபடி பாசனத்திற்கு, தொடர்ந்து நீர் திறப்பதால், மேட்டூர் அணை கையிருப்பு வேகமாக குறைந்து வருகிறது. கர்நாடகா முறைப்படி நீரை வழங்கினால் மட்டுமே, அடுத்தாண்டு, ஜனவரி மாதம் வரை அணையில் இருந்து, தட்டுப்பாடின்றி நீர் திறக்க முடியும். ஆனால் உச்ச நீதிமன்றத்தின் இந்த தீர்ப்பு தமிழக விவசாயிகளிடையே அதிர்ச்சியை ஏற்படுத்தியுள்ளது

Leave a Reply

Your email address will not be published. Required fields are marked *