thirumalpurசோம வாரம் எனப்படும் திங்கள்கிழமையில் திருமால்பூர் என்னும் ஊருக்கு வந்து சிவ தரிசனம் செய்வது பெரிய விசேஷம்! அதேநேரம், பெருமாளுக்கே வரம் தந்த சிவனாரை, இங்கே எந்தக் கிழமையிலும் வந்து வேண்டிக் கொள்ளலாம். ஆயிரம் தாமரை மலர்களால் அர்ச்சித்ததில் குளிர்ந்துபோன ஸ்ரீமணிகண்டீஸ்வரருக்கு நாம் – ஆயிரம் மலர்களெல்லாம் வேண்டாம், ஒரேயொரு தாமரைப்பூ, கொஞ்சம் வில்வம் கொண்டு வந்து சார்த்தினாலே போதும்; குளிர்ந்துவிடுவார் ஈசன். வரப்பிரசாதியான சிவனாரை தரிசிக்க தரிசிக்க, வணங்க வணங்க, நம் வாழ்வில் சுபிட்சம் நிறைந்திருக்கும் என்பதில் சந்தேகமே இல்லை” என்று உணர்ச்சி மேலிடச் சொல்கிறார் சண்முக குருக்கள்.

கிழக்குப் பார்த்த கோபுரத்தின் வழியே நுழைந்து, கருவறையில் கிழக்குப் பார்த்தபடி காட்சி தருகிற ஸ்ரீமணிகண்டீஸ்வரரைத் தரிசித்தால் மிகுந்த பலன் உண்டு. லிங்கத் திருமேனிக்கு வஸ்திரம் சார்த்தி, தாமரையும் வில்வமும் சமர்ப்பித்து வழிபட்டால், நினைத்த காரியம் எதுவாயினும், அது விரைவில் நிறைவேறும் என்பது ஐதீகம்!

மிகச் சிறிய மூர்த்தம்தான். ஆனால், வானளாவிய கீர்த்தியைக் கொண்டவர் ஸ்ரீமணிகண்டீஸ்வரர். மனக்கிலேசம் உள்ளவர்கள், குழப்பத்தில் தவிப்பவர்கள், இனம் புரியாத கவலையும் துக்கமும் கொண்டு கலங்குபவர்கள், எதிலும் தயக்கம் எப்போதும் சோகம் என இருப்பவர்கள் இங்கு திங்கட்கிழமையன்று வந்து, வழிபடுவது சிறப்பு!

காரணம், திங்கள்கிழமை என்பது சிவனாருக்கு உகந்த நாள். திங்கள் என்றால் சந்திரன். அவன் மனோகாரகன். சந்திரனும் இந்தத் தலத்தில் தங்கி, ஈசனை வழிபட்டுள்ளான். எனவே, இங்கு வந்து வழிபட்டால், சந்திர பலம் பெருகும்; மனோபலம் அதிகரிக்கும்; மனக்கிலேசங்கள் யாவும் விலகும்; குழப்பங்கள் தீர்ந்து, தெளிவான மனோநிலை பெற்று, மன உறுதியுடன் செயல்பட முடியும்.

அதேபோல், இழந்த பொருளைப் பெறுவதற்கும், இழந்த அல்லது தடைப்பட்ட பதவியை அடைவதற்கும் திருமால்பூர் மணிகண்டீஸ்வரரை வணங்கினால், விரைவில் நல்ல பலன் கிட்டும் என்கிறார்கள் பக்தர்கள்.

இழந்த தன் சக்ராயுதத்தை திருமால் தவமிருந்து பெற்ற தலம் இது. சந்திர பகவான், இழந்த தன் பொலிவை மீண்டும் அடைவதற்கு தவம் இருந்து, பலன் பெற்றதும் இங்குதான். எனவே, இங்கு வந்து சிவ தரிசனம் செய்து, சிவனாருக்கு வஸ்திரம் சார்த்தி, சர்க்கரைப் பொங்கல் நைவேத்தியம் செய்து வழிபட்டால், இழந்ததை விரைவில் பெறலாம்.

‘கடன் சுமை தாளாம வீடு- வாசல்னு விக்கவேண்டியதாப் போச்சு’ என்று கலங்கிக் கண்ணீர் விடுபவர்கள், இங்கு வந்து, ஈசன் சந்நிதியில் தங்கள் குறையைச் சொன்னால் போதும்; அவர்களுக்குச் சீக்கிரமே வீடு- வாசல் அமைந்துவிடும். ‘என் படிப்புக்கேத்த வேலையே கிடைக்கலை’ என்று தவிப்பவர்களுக்கு, அவர்களின் தகுதிக்கு ஏற்ற வேலை உடனே கிடைக்கும். ‘ஊதிய உயர்வும் இல்லை; பதவி உயர்வும் எப்போனு தெரியலை’ என ஏங்குவோர் இங்கு வந்து வழிபட்டால், சீக்கிரமே ஊதிய உயர்வும், பதவி உயர்வும் கிடைக்கப் பெறுவார்கள்.

திருமணம் தடைப்பட்டால், அவர்களுக்கு விரைவிலேயே திருமணம் நடைபெறும். பிள்ளைச் செல்வம் இல்லையே எனக் கலங்குவோர், விரைவில் சூல் கொள்வார்கள். நல்ல மழை பெய்ய வேண்டும் என்று சிவனாரின் சந்நிதியில் வேண்டிக் கொண்டால், அந்த முறை மழை வெளுத்துவாங்கும்; விவசாயம் செழித்திருக்கும் என்பது இந்தப் பகுதி மக்களின் நம்பிக்கை.

”வழக்கில் இழுபறி நிலையில் இருப்பவர்கள், இங்கு வந்து ஸ்ரீமணிகண்டீஸ்வரருக்கு அபிஷேகம் செய்து, தாமரை மலர் சூட்டி, சர்க்கரைப் பொங்கல் நைவேத்தியம் செய்து வழிபட்டால், வழக்கில் வெற்றி பெறுவார்கள். அதேபோல், சிவனாருக்கு அபிஷேகங்கள் செய்து, தயிர் சாதம் நைவேத்தியம் செய்து பக்தர்களுக்கு வழங்கினால், எதிரிகள் தொல்லையில் இருந்து விடுபடுவார்கள். கருத்து வேற்றுமையுடன் கிழக்கும் மேற்குமாக இருக்கும் தம்பதி, மனம் ஒருமித்து இணைந்து, இணை பிரியாமல் வாழ்வார்கள். பிரார்த்தனை நிறைவேறியவர்கள், மாசி மாதம் நடைபெறும் பிரம்மோத்ஸவ விழாவில் கலந்துகொண்டு, தங்களால் முடிந்த அளவு காணிக்கைகளைச் செலுத்துவார்கள்” என்கிறார் சண்முக குருக்கள்.

வேலூர் மாவட்டத்தின் கடைக் கோடியில், எங்கோ ஒரு மூலையில் இருக்கும் இந்தத் திருமால்பூர் தலத்தை, பக்தர்கள் பலர் இன்னும் சரிவர அறியவில்லை. காஞ்சிபுரம் மாவட்டத்துக்கு அருகில் இருந்தாலும்கூட, காஞ்சிக் கோயில்கள்போல இந்தக் கோயில் பிரசித்தி பெறவில்லை. அவசியம் சென்று தரிசிக்க வேண்டிய தலம் இது.

சிவலிங்கத்தை நோக்கிக் கைகூப்பி நிற்கிற திருமால் அருகிலும், சிவ சந்நிதியிலும் நல்ல அதிர்வுகள் பரவியிருப்பதை மிக எளிதாக உணர முடியும். கோபுரத்துக்குள் நுழையும்போதே    நந்திதேவரைத் தரிசிக்க முடிவது, இந்த ஆலயத்தின் சிறப்புகளில் ஒன்று.

”பொதுவாக, கோயிலுக்குள் நுழைந்ததும் பலிபீடம், நந்தி, கொடிமரம் ஆகியவை இருக்கும். இந்தக் கோயிலிலும் இவை அமைந்துள்ளன. ஆனால், இங்கே கோபுர வாசலையொட்டி, கை கூப்பிய நிலையில் உள்ள நந்திதேவரைத் தரிசிக்கலாம். இது காண்பதற்கு அரிதான தரிசனம் எனப் பெரியோர் சொல்லி வைத்திருக்கிறார்கள். குறிப்பாக, பிரதோஷ நாளில் எல்லாக் கோயில்களையும்போல, இங்கேயும் நந்திக்கு சிறப்பு அபிஷேக- ஆராதனைகள் நடைபெறுகின்றன. அப்போது, நந்தியைத் தரிசிப்பது பெரும் புண்ணியம் என்கிறது சைவாகம சம்பிரதாயம். இங்கே கூடுதலாக, மனித உருவில் உள்ள நந்திதேவரையும் தரிசித்து வணங்குவது மகா புண்ணியம் எனப் போற்றுகிறார்கள்” என்று சிலிர்ப்புடன் தெரிவிக்கிறார் சண்முக குருக்கள்.

சிவனாரின் சந்நிதிக்கு எதிரில் கை கூப்பி வணங்கிய நிலையில் திருமால் காட்சி தருவது சிலிர்ப்பை ஏற்படுத்துகிறது என்றால், திருக்கயிலாயத்தின் நுழைவாயிலில் வருவோரைக் கவனித்துக் கொண்டே சிவனாரை வணங்கி நிற்கிற நந்திதேவர், இங்கே திருமால்பூர் திருத்தலத்திலும் அதேபோன்று நிற்பது பரவசம் தருகிறது.

திருமால்பூருக்கு வந்து சிவ தரிசனம் செய்யத் துவங்குவதற்கு முன்பாக, கோபுர வாசலுக்கு அருகில் உள்ள நந்திதேவரிடம் ஒரு நிமிடம் நில்லுங்கள். ‘என் வாழ்க்கையில் ஒளியேற்றி, எல்லா துன்பங்களையும் களையச் செய்து, என் வாழ்வை இனிமையாக்க, சிவனாரிடம் எனக்காகப் பரிந்துரை செய்யுங்களேன், நந்திதேவரே!’ என மனதார வேண்டிக் கொள்ளுங்கள். நந்திதேவர் உங்களுக்காக, உங்கள் குடும்ப நலனுக்காக, சிவனாரிடம் முறையிட்டு, அருள் பெற்றுத் தருவார் என்பது நிச்சயம்.

(வேண்டுவோம்)

படங்கள்: சொ.பாலசுப்ரமணியன்

எங்கே இருக்கிறது? எப்படிச் செல்வது?

வேலூர் மாவட்டத்தில் உள்ளது திருமால்பூர். சென்னை கடற்கரை ரயில் நிலையத்தில் இருந்து, திருமால்பூருக்கு புறநகர் ரயில்கள் உள்ளன. காஞ்சிபுரத்தில் இருந்து அரக்கோணம் செல்லும் வழியில், சுமார் 14 கி.மீ. தொலைவில் உள்ளது திருமால்பூர். சென்னையில் இருந்து வேலூர் செல்லும் சாலையில், காஞ்சிபுரம் செல்லும் வளைவை அடுத்து வரும் மேம்பாலத்தின் கீழே சென்று, அரக்கோணம் செல்லும் சாலையில் பயணித்தால், சுமார் 14 கி.மீ. தொலைவில் உள்ள திருமால்பூர் ரயில்வே ஸ்டேஷனை அடையலாம். அங்கிருந்து சுமார் 4 கி.மீ. தொலைவு சென்றால், ஊரையும் ஊருக்கு நடுவே உள்ள ஸ்ரீமணிகண்டீஸ்வரர் ஆலயத்தையும் அடையலாம். ரயில் நிலையத்திலிருந்து ஆட்டோ மற்றும் ஷேர் ஆட்டோ வசதி உண்டு.

வரன் தேடுகிறீர்களா? தமிழ் மேட்ரிமோனியில் - பதிவு இலவசம்!
shadow

Related Posts

Leave a Reply

Your email address will not be published. Required fields are marked *