பாகிஸ்தானுக்கு பதிலடி கொடுத்த ஆஸ்திரேலியா

பாகிஸ்தான் – ஆஸ்திரேலியா இடையிலான முதல் டெஸ்ட் துபாயில் நடைபெற்று வருகிறது. டாஸ் வென்று பேட்டிங் தேர்வு செய்த பாகிஸ்தான் முதல் இன்னிங்சில் 482 ரன்கள் குவித்தது. முகமது ஹபீஸ் (126), ஹரிஸ் சோஹைல் (110) சதம் அடித்தனர்.

பின்னர் ஆஸ்திரேலியா முதல் இன்னிங்சை தொடங்கியது. நேற்றைய 2-வது நாள் ஆட்ட முடிவில் ஆஸ்திரேலியா விக்கெட் இழப்பின்றி 13 ஓவரில் 30 ரன்கள் எடுத்திருந்தது. கவாஜா 17 ரன்னுடனும், ஆரோன் பிஞ்ச் 13 ரன்னுடனும் களத்தில் இருந்தார்.

இன்று 3-வது நாள் ஆட்டம் தொடங்கியது. இருவரும் தொடர்ந்து சிறப்பான ஆட்டத்தை வெளிப்படுத்தினார். விக்கெட் இழக்காமல் பார்த்துக் கொண்டனர். அறிமுக போட்டியில் ஆரோன் பிஞ்ச் 95 பந்தில் 5 பவுண்டரி, 1 சிக்சருடன் அரைசதம் அடித்தார்.

ஆரோன் பிஞ்சிற்கு இதுதான் அறிமுக டெஸ்ட் ஆகும். அறிமுக டெஸ்டிலேயே அரைசதம் அடித்து அசத்தியுள்ளார். மறுமுனையில் விளையாடும் கவாஜாவும் அரைசதம் அடித்துள்ளார். ஆஸ்திரேலியா 3-வது நாள் மதிய உணவு இடைவேளை வரை 46 ஓவரில் விக்கெட் இழப்பின்றி 137 ரன்கள் சேர்த்துள்ளது. ஆரோன் பிஞ்ச் 59 ரன்களுடனும், கவாஜா 68 ரன்களுடனும் களத்தில் உள்ளனர்.